விருத்தாசலம் அருகே உள்ள சாத்தப்பாடி கிராமத்தைச் சேர்ந்த விவசாயி செல்வம், நேற்று தனது விளை நிலத்தில் பணியாற்றிக் கொண்டிருந்தார். அப்போது நிலத்தில் அறுந்து கிடந்த மின்கம்பியை அவர் தவறுதலாக மிதித்ததால், மின்சாரம் பாய்ந்து அவர் சம்பவ இடத்திலேயே உயிரிழந்தார்.
தகவல் கிடைத்த விருத்தாசலம் போலீசார், செல்வத்தின் உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதையடுத்து, மின்சார வாரியத்தின் அலட்சியத்தால் விவசாயி உயிரிழந்ததாக கூறி, கிராம மக்கள் சாலை மறியல் போராட்டத்தில் ஈடுபட்டனர்.
அவர்கள், செல்வத்தின் குடும்பத்திற்கு ரூ.50 லட்சம் இழப்பீடு மற்றும் ஒரு அரசு வேலை வழங்க வேண்டும் என்று கோரிக்கை விடுத்தனர். போலீசார் மற்றும் நிர்வாக அதிகாரிகள் பேச்சுவார்த்தை நடத்தியதால் போராட்டம் கலைக்கப்பட்டது.