பிரபல யூடியூப் சேனல் நடத்தும் கோபி, சுதாகர் மற்றும் அவர்களது குழுவினர், சமூக வலைத்தளங்களில் சுவாரஸ்ய வீடியோக்களையும் நகைச்சுவை நாடகங்களையும் வெளியிட்டு வருகிறார்கள். சமீபத்தில் ‘சொசைட்டி பாவங்கள்’ என்ற தலைப்பில் வெளியிட்ட வீடியோ வைரலாகி வருகிறது.
இந்த நிலையில், இந்த வீடியோவால் ஒரு குறிப்பிட்ட சமூகத்தின் மரியாதையைத் தளர்த்தும் வகையில் சித்தரிக்கப்பட்டுள்ளது என வழக்கறிஞர் தனுஷ்கோடி கோவை மாநகர காவல் ஆணையரிடம் புகார் அளித்துள்ளார்.
அவரது புகாரில்,“திருநெல்வேலி பகுதியில் இரண்டு குடும்பங்களுக்கு இடையில் நடந்த ஒரு சாதாரண மோதல் சம்பவத்தை, சமூகங்களுக்கு இடையேயான மோதல் போல திரித்து காட்டப்பட்டுள்ளது.
குறிப்பிட்ட சமூகத்தின் அடையாளங்களைப் பதிவு செய்து, அந்த சமூகத்தை அவமதிக்கும் வகையில் வசனங்கள் இடம் பெற்றுள்ளன. மேலும், வீடியோவில் வன்முறையைத் தூண்டும் உரைகளும் இடம் பெற்றுள்ளன. எனவே இந்த வீடியோவை யூடியூப்பில் இருந்து அகற்ற வேண்டியது அவசியம்” என கூறியுள்ளார்.
மேலும், இதுபோன்ற வீடியோக்கள் மீண்டும் வெளியிடாதவாறு முன்கூட்டியே நடவடிக்கை எடுக்க கோரப்பட்டுள்ளது.
இது தொடர்பாக போலீசார் விசாரணையை தொடங்கியுள்ளதாக தகவல் வெளியாகியுள்ளது. யூடியூப் நெறிமுறைகள், சமூக ஒற்றுமை மீதான தாக்கம் என பல்வேறு கோணங்களில் இது தற்போது விவாதமாகி வருகிறது.