முன்னாள் முதலமைச்சர் எடப்பாடி பழனிசாமி தற்போது தமிழக சட்டமன்றத்தில் எதிர்க்கட்சித் தலைவராக உள்ள நிலையில், அவரது சென்னை கிரீன்வேஸ் சாலையில் உள்ள இல்லத்துக்கு மீண்டும் வெடிகுண்டு மிரட்டல் வந்தது பரபரப்பை ஏற்படுத்தியுள்ளது.
சென்னை உயர்நீதிமன்றத்திற்கு நேற்று மாலை வந்த ஒரு இமெயிலில், உயர்நீதிமன்றம், சிபிஐ அலுவலகம் மற்றும் எடப்பாடி பழனிசாமியின் வீடு ஆகிய இடங்களில் வெடிகுண்டுகள் வெடிக்கும் என மிரட்டல் தெரிவிக்கப்பட்டுள்ளது. தகவல் கிடைத்தவுடன் போலீசார் வினைத்திறனுடன் செயல்பட்டு, வெடிகுண்டு நிபுணர்கள் மற்றும் மோப்ப நாய்களின் உதவியுடன் தீவிர சோதனையில் இறங்கினர்.
எடப்பாடி பழனிசாமியின் வீட்டிலும் விரிவான சோதனை நடைபெற்றது. சோதனை முடிவில் இது வெறும் புரளி என்றும் எந்தவிதமான வெடிகுண்டும் கண்டுபிடிக்கப்படவில்லை என்றும் போலீசார் தெரிவித்தனர்.
ஏற்கனவே சேலத்தில் உள்ள அவரது சொந்த வீட்டுக்கு இரண்டு முறை வெடிகுண்டு மிரட்டல் வந்திருக்கிறது.
இந்நிலையில், தற்போது மூன்றாவது முறையாக சென்னை இல்லத்திற்கு மிரட்டல் வந்துள்ளதை போலீசார் மிகுந்த கவனத்துடன் எடுத்துக்கொண்டு, அந்த இமெயிலை அனுப்பிய நபர் யார் என்பதை கண்டறிய தீவிர விசாரணையில் ஈடுபட்டுள்ளனர்.
அத்துடன் பாதுகாப்பு முன்னெச்சரிக்கையாக, அவரது இல்லம் உள்ளிட்ட முக்கிய இடங்களில் போலீஸ் காவல் பலப்படுத்தப்பட்டுள்ளது.