சிவகங்கை மாவட்டம் காளையார்கோவில் அருகே செயல்படும் அரசு உதவி பெறும் பள்ளி விடுதியில் படித்து வந்த ஒன்பதாம் வகுப்பு மாணவி திடீரென மரத்தில் தூக்கிட்டு உயிரை மாய்த்துக் கொண்டதாக கூறப்படுகிறது. இந்த சம்பவம் அந்த பகுதியில் பெரும் சோகத்தையும் சந்தேகத்தையும் எழுப்பியுள்ளது.
மாணவி தற்கொலை செய்து கொண்ட காரணம் தொடர்பாக இன்னும் தெளிவான தகவல்கள் தெரியவராத நிலையில், போலீசார் சம்பவ இடத்தில் விசாரணை மேற்கொண்டனர். இந்த நேரத்தில், மாணவியின் மரணம் இயல்பானது அல்ல என்றும் அதில் பல சந்தேகங்கள் உள்ளதாகவும் கூறி, அவரது பெற்றோரும் உறவினர்களும் போலீசாரிடம் புகார் தெரிவித்துள்ளனர்.
இதையடுத்து, மாணவியின் உடலை போலீசார் கைப்பற்றி சிவகங்கை அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மாணவியின் மரணத்திற்கான காரணங்களை உறுதிப்படுத்தும் வகையில் போலீசார் அனைத்து கோணங்களிலும் தீவிர விசாரணை செய்து வருகின்றனர்.
இந்த சம்பவம் கல்வி நிறுவனங்களின் விடுதிகளில் மாணவர்களின் பாதுகாப்பு மீதான கேள்விகளை மீண்டும் எழுப்பியுள்ளது.